Mediat franceze dhe zvicerane përshkruajnë Shqipërinë si thesarin e fshehur të Mesdheut dhe Tiranën vend unik

Në sy, gazetares zvicerane i ka rënë edhe Piramida e shndërruar sot në një qendër të gjallë plot art ku mësohet për teknologjinë e informacionit

Tirana është sërish në fokusin e promovimit të medieve franceze dhe zvicerane, “Je Papote”, “Voyage Privé” dhe “Tages-Anzeiger” të cilat e përshkruajnë Shqipërinë si thesarin e fshehur të Mesdheut me një bregdet magjepsës dhe kulturë të pasur.

Transformimi me ritme të shpejta i Tiranës, ka habitur drejtuesen e seksionit të udhëtimeve të një prej të përditshmeve më të mëdha zvicerane në gjuhën gjermane Tages-Anzeiger. Ndaj dhe Paulina Shçeshniak e diplomuar për histori arti, pasi bëri një udhëtim në të kushtoi një artikull të gjatë ku shpreh vlerësimet më të larta, shkruan ATSH, transmeton albinfo.ch.

Pas dekadash të tëra ndërtimesh me arkitekturë të ngurtë dhe me kënde gjatë periudhës së diktaturës, Tirana tashmë ka marrë një pamje krejt tjetër, që bëri që ajo dhe ekipi që e shoqëronte në udhëtim të binte në dashuri. Dhe kjo për faktin se, siç shkruan që në krye të artikullit, “Tirana është bërë seksi në mënyrë rastësore, plot me ide dhe ku gjithashtu gatuhet mirë”.

Media zvicerane shkruan se, dikur diktatori krenohej vetëm me Hotel Tiranën, si ndërtesën më të lartë të kryeqytetit, ndërsa sot, sheshi qendror ashtu si gjithë kryeqyteti është një kantier ndërtimi.

Shumëkatëshit e rinj e i kanë dhënë qendrës, një pamje jokonvencionale dhe lozonjare, duke veçuar një ndërtesë me ngjyrë ari, një tjetër me formën e kokës së heroit kombëtar apo atë me hartën e Shqipërisë.

Në sy, gazetares zvicerane i ka rënë edhe Piramida e shndërruar sot në një qendër të gjallë plot art ku mësohet për teknologjinë e informacionit, nga një vend i zymtë i ngritur për të përkujtuar diktatorin e vdekur.

Edhe kryebashkiaku i Tiranës, Erion Veliaj, përmes një postimi në rrjetet sociale, u ka bërë jehonë medieve franceze e zvicerane, që së fundmi kanë promovuar Shqipërinë: “Je Papote”, “Voyage Privé” dhe “Tages-Anzeiger”, të cilat e përshkruajnë vendin tone si thesarin e fshehur të Mesdheut. Ndërsa Tiranën e cilësojnë si një qytet unik, plot me ide dhe ku gjithashtu gatuhet shumë mirë.

---