Mbrëmje shqiptare në Vjenë me shkrimtarin Arben Kallamata

Të shtunën, më 25 mars, në Vjenë u organizua një mbëmje me shkrimtarin dhe publicistin Arben Kallamata, raporton albinfo.at

Një mbrëmje që filloi shumë e qetë, ndërkohë inspiroi pyetje largpamëse që angazhojnë nocionin e shqiptarisë në shekuj. Mes rreshtash dhe antitezash, u diskutua rreth identitetit të popullit shqiptar, duke shtruar një pyetje legjitime: gjendet ai ende në një krizë të parikuperuar apo është thjesht një trend i nivelit të personalitetit kombëtar momental?

Një pyetje tjetër u shtrua përreth dy romaneve të autorit: A është e afërt apo e largët ideja e pasqyrimit të shqiptarëve të Arben Kallamatës?

Këto nocione dhe mentalitete shqiptare i trajton Kallamata në dy romanet e tij, “Hijet e muzgut” dhe “Un Mort”, duke rikthyer historinë nëpërmjet stilit të rafinuar letrar, gjë që njihet relativisht vonë në traditën e letërsisë shqiptare. Fokusi kryesor qëndron nën penën tërheqëse të Kallamatës në ndërthurjen e elementeve historike dhe mitologjike, duke i dërguar këto në një dimension antitezash, në të cilin ai pozicionon dhe nocionin e identitetit të shqiptarëve. Sigurisht fantazia e tij si dhe pena analiste dhe tejet metaforike ofrojnë për lexuesin një përjetim të veçantë, të paharrueshëm, shkruan albinfo.at.

Përpunimi i së kaluarës është një hap i rëndësishëm për zhvillimin dhe rigjetjen e “UNIT” filozofik dhe identitar shqiptar. Projektimi dhe reflektimi i të kaluarës sonë na tregon së fundmi, siç thotë dhe Gandhi: “Historia i mëson ata njerëz që s´mësojnë nga historia”. Pra, vlen për ne shqiptarët, që dikur duhet të fillojmë të mësojmë nga historia jonë.

Mbrëmja u organizua nga “Glanz- Ing. Tendler  Performances”, Znj. Ingrid Mukeli Tendler, Z. Benson Tendler, Znj. Matilda dhe Z. Arben Seferi, Z. Arben Spiro etj.

Romanet e Arben Kallamatës mund t’i gjeni në Adrion, Tiranë, Amauon si dhe Amazon.

---