Mbi 5 milionë euro fitime nga kontrata e re, Mirlind Daku kalon te Spartaku i Moskës

Sulmuesi i Kombëtares së Shqipërisë, Mirlind Daku, me origjinë nga Kosova, ka realizuar një nga transferimet më të rëndësishme në karrierën e tij, duke kaluar nga Rubin Kazani te Spartaku i Moskës.

Klubi nga kryeqyteti rus ka aktivizuar klauzolën e blerjes së futbollistit, duke paguar rreth 11 milionë euro për shërbimet e tij. Përveç shumës së transferimit, marrëveshja personale e Dakut me Spartakun përfshin edhe përfitime të mëdha financiare.

Në sezonet e ardhshme, Daku do të marrë një pagë vjetore prej 2.5 milionë eurosh, ndërsa kontrata përfshin edhe një bonus besnikërie prej 1.25 milionë eurosh. Përveç kësaj, sulmuesi ka përfituar edhe 1.5 milionë euro si shpërblim për nënshkrimin e kontratës me klubin e ri.

Në total, marrëveshja e tij me Spartakun e Moskës kap vlerën prej 5.25 milionë eurosh vetëm nga përfitimet personale të kontratës.

Daku iu bashkua futbollit rus në vitin 2023, kur u transferua nga Osijeku për 1.2 milionë euro. Para aventurës në Rusi, ai kishte luajtur për Muranin në Slloveni, Kukësin në Shqipëri, si dhe për Llapin dhe Ballkanin në Kosovë.