Maqedonia, shteti i vetëm me masa rigoroze gjatë hyrjes në vend

Keystone EPA/GEORGI LICOVSKI

Ndonëse autoritetet shtetërore paralajmëronin hapje të koordinuar të kufijve me shtetet e rajonit, mbetëm shteti i vetëm në rajon, për të mos thënë në gjithë kontinentin, me kufij të hapur, por me masa rigoroze në fuqi. Përderisa personave që hyjnë në shtetet e tjera eventualisht mund t’iu matet temperatura në kufi, për kryeministrin Oliver Spasovski është akoma e logjikshme që të gjithëve që hyjnë në territorin e vendit tonë t’iu kërkohet test negativ PCR dhe deklaratë për vetizolim 14-ditor. Spasovski megjithatë thotë se së shpejti do të diskutohet për heqjen e këtyre masave.

Logjika është të mos hyjmë në rrezik, e dini se në shtetin tonë sëmundja erdhi nga Italia. Është plotësisht logjike të mos kemi rrezik dhe të bëjmë çmos që ta zvogëlojmë atë rrezik. A mendojmë për heqjen e këtyre masave? Po, mendojmë dhe së shpejti do të flasim edhe për këtë, deklaroi Oliver Spasovski, kryeministër.

Vendimi i fundit i Qeverisë për hapjen e të gjitha pikave kufitare shkaktoi huti në opinion dhe reagimin e partive opozitare, sipas të cilëve derisa do të vazhdojë të vlejë rregulli “Pa test negativ, në karantinë shtetërore”, nuk ka asnjë dallim nëse kufijtë shtetërorë hapen ose jo. Madje turistët e huaj, të cilët tranzitojnë kushtëzohen që për 5 orë ta lëshojnë vendin.