Maqedoni e Veriut: Ulet numri i martesave, rritet numri i divorceve

Në Maqedoni të Veriut, gjatë vitit 2025, u lidhën 10.507 martesa, që përbën një rënie prej 5.1 përqind krahasuar me vitin e kaluar, sipas të dhënave nga Enti Shtetëror i Statistikave.

Sipas këtyre të dhënave, në të njëjtën periudhë, u regjistruan 2.185 divorce, ose 8 për qind më shumë se vitin e kaluar, teksa numri më i lartë i martesave ishte në gusht 1,362, që përfaqëson 13 për qind të numrit të përgjithshëm të martesave. Numri më i ulët i martesave ishte në mars, kur u lidhën 473 martesa, ose 4.5 për qind, transmeton albinfo.ch.

Të dhënat tregojnë se martesa më e zakonshme është martesa e parë. Ndër gratë, martesa e parë përbën 92.8 për qind, dhe ndër burrat 92.1 për qind. Burrat hyjnë më shpesh në martesa të dyta dhe të treta, martesa e dytë përbën 7.1 për qind, ndërsa martesa e tretë përbën 0.8 përvqind të numrit të përgjithshëm të martesave.

Mosha mesatare në martesën e parë është 27.5 vjeç për nusen dhe 30.2 vjeç për dhëndrin.

Sipas moshës, shumica e martesave në vitin 2025 u lidhën në grupmoshën nga 25 deri në 29 vjeç. Tek gratë në këtë grup, u regjistruan 3.448 martesa, ose 32.8 përqind, ndërsa tek burrat 3.750 martesa, ose 35.7 përqind.

Megjithatë, numri më i madh i divorceve ndodhi në grupmoshën nga 35 deri në 39 vjeç. Ndër gratë u regjistruan 400 divorce, ose 18.3 përqind, dhe ndër burrat, 381 divorce, ose 17.4 përqind.

Sipas kohëzgjatjes së martesës, shumica e divorceve ndodhën midis 5 dhe 9 viteve pas përfundimit të martesës. Në këtë kategori u regjistruan 478 divorce, që përfaqëson 21.9 përqind të numrit të përgjithshëm të divorceve.