Manifestimet e “Vidovdan-it”: Policia shoqëron 17 persona për provokim

Manifestimet e “Vidovdan-it” nga serbwt janë zhvilluar pa ndonjë incident madhor, nën mbikëqyrjen dhe masat e koordinuara të Policisë së Kosovës, e cila ka qenë e angazhuar në të gjitha nivelet operacionale për menaxhimin e sigurisë dhe rendit publik, raporton albinfo.ch.

Nga raportimet e njësive në terren, ngjarja ka kaluar pa ndonjë incident serioz që do të rrezikonte sigurinë publike. Megjithatë, policia ka shoqëruar në stacion 17 persona, të cilët dyshohet se kanë provokuar pjesëmarrësit me veprime që nxisin urrejtje dhe me veshje me përmbajtje provokuese e kundërligjore.

Në koordinim me organet e drejtësisë, një person është ndaluar me dyshimin për veprën penale të armëmbajtjes pa leje, ndërsa një tjetër është sanksionuar me fletëparaqitje për kundërvajtje. Katër prej të shoqëruarve janë liruar, ndërsa 11 persona të tjerë po vazhdojnë të intervistohen, raporton albinfo.ch.