Lozanë: Veshjet tradicionale shqiptare, mesazh i fortë për identitetin dhe rininë

Ekspozita paraqiti një koleksion të pasur të veshjeve tradicionale nga treva të ndryshme shqiptare duke na ofruar një udhëtim në histori, traditë dhe identitet

Më 2 maj 2026, në ambientet e Universitetit të Lozanës (UNIL), u mbajt ekspozita “Trésors Vestimentaires”, një ngjarje kulturore që solli në qendër të vëmendjes pasurinë dhe identitetin e veshjeve tradicionale shqiptare, raporton albinfo.ch.

E organizuar nga Shoqata e Studentëve Shqiptarë në Lozanë, kjo ekspozitë mblodhi një numër të madh pjesëmarrësish-studentë, përfaqësues institucionalë dhe dashamirës të kulturës shqiptare-duke krijuar një atmosferë të ngrohtë dhe autentike në zemër të një prej universiteteve më të njohura në Evropë.

Një thesar kulturor i sjellë në jetë

Ekspozita paraqiti një koleksion të pasur të veshjeve tradicionale nga treva të ndryshme shqiptare, të kuruara nga Flora Balaj, duke ofruar për publikun një udhëtim vizual në histori, traditë dhe identitet.

Vizitorët patën mundësinë të shohin nga afër detajet e punuara me mjeshtëri, ngjyrat karakteristike dhe simbolikën që mbart çdo kostum-elemente që dëshmojnë për një trashëgimi të ruajtur ndër shekuj.

“ILIRËT” i dhanë shpirt traditës

Një nga momentet më të veçanta të aktivitetit ishte performanca e ansamblit “ILIRËT” në Lozanë, ku një grup vajzash të reja të veshura me kostume tradicionale sollën në skenë hijeshinë dhe elegancën e kulturës shqiptare.

Vallet tradicionale të interpretuara prej tyre krijuan emocione të forta tek publiku dhe i dhanë aktivitetit një dimension të gjallë artistik, duke e kthyer ekspozitën në një përvojë të plotë kulturore.

Mesazh i fortë për rininë shqiptare

Në një prononcim për albinfo.ch, Fane Shala, kryetare e Shoqatës së Studentëve Shqiptarë në Lozanë, theksoi se ideja për këtë ekspozitë kishte lindur prej muajsh, me synimin për të prezantuar pasurinë kulturore shqiptare edhe për komunitetet e tjera në Lozanë.

 

“Trashëgimia jonë është një thesar. Kemi dashur ta ndajmë këtë pasuri dhe t’ua tregojmë edhe të tjerëve vlerat tona kulturore,” u shpreh ajo, duke dhënë edhe një mesazh të drejtpërdrejtë për të rinjtë:

“Mos ngurroni të prezantoni kulturën tuaj. Merrni pjesë në aktivitete të tilla. Le të marrim shembull nga arbëreshët në Sicili, që kanë arritur ta ruajnë kulturën e tyre për qindra vite-pse të mos e bëjmë edhe ne?”

Pjesëmarrje e gjerë dhe interes i madh

Në këtë aktivitet morën pjesë edhe figura publike shqiptare, përfshirë politikanët e rinj me rrënjë shqiptare si Musa Kamenica dhe Gzim Rama, si dhe përfaqësues të institucioneve diplomatike.

Ndër të pranishmit ishte edhe Monika Zguro, përfaqësuese e Ambasadës së Shqipërisë në Zvicër, që dëshmon mbështetjen institucionale për promovimin e kulturës shqiptare në diasporë.

Prania e tyre, së bashku me komunitetin e gjerë, tregoi interesin në rritje për ruajtjen dhe promovimin e trashëgimisë kulturore shqiptare.

Identitet që jeton edhe larg atdheut

Ekspozita “Trésors Vestimentaires” nuk ishte vetëm një prezantim i veshjeve tradicionale, por një dëshmi e gjallë se identiteti shqiptar vazhdon të jetojë dhe të përcillet edhe jashtë kufijve.

Në një kohë kur ruajtja e kulturës bëhet gjithnjë e më sfiduese, aktivitete të tilla tregojnë qartë se diaspora shqiptare jo vetëm që e ruan këtë trashëgimi, por e promovon atë me krenari dhe dinjitet.

Hyrja në ekspozitë ishte e hapur për publikun dhe aktiviteti u mirëprit gjerësisht nga të pranishmit

 

 

---