Lirim Koraqi zhvillon vizitë shkencore në Universitetin e Yorkut në Mbretërinë e Bashkuar

Sukses akademik ndërkombëtar për Lirim Koraqin në Mbretërinë e Bashkuar dhe SHBA

Lirim Koraqi, me prejardhje nga fshati Kovaçec i Komunës së Kaçanikut, aktualisht është duke realizuar një vizitë shkencore në Universitetin e Yorkut në Mbretërinë e Bashkuar, në kuadër të School of Physics, Engineering and Technology Exhibition Centre, si pjesë e studimeve të tij të doktoraturës, shkruan albinfo.ch

Vizita akademike ka për qëllim thellimin e bashkëpunimit shkencor dhe avancimin e hulumtimeve në fushën e inxhinierisë dhe teknologjisë, duke kontribuar në zhvillimin profesional të tij në nivel ndërkombëtar.

Gjatë vitit të kaluar, Koraqi ka prezantuar gjithashtu punimin e tij shkencor në Konferencën ndërkombëtare IEEE EMC + SIPI 2025, e mbajtur në Raleigh, Karolina e Veriut, SHBA, shkruan tutje albinfo.ch.

Punimi i prezantuar është vlerësuar me çmimin “Best Student Paper Award (Honorable Mention)”, duke konfirmuar cilësinë dhe rëndësinë e hulumtimit të tij shkencor.

Ky sukses përfaqëson një arritje të rëndësishme akademike dhe një kontribut domethënës në prezantimin e potencialit shkencor të Kosovës në arenën ndërkombëtare. /Albinfo.ch

---