LAPSH Bavari organizon seminar për mësuesit shqiptarë, në fokus cilësia e mësimit në diasporë

Trajnimi në Dachau mblodhi mësues, përfaqësues institucionesh dhe ekspertë të arsimit, me synim forcimin e mësimdhënies së gjuhës shqipe dhe shkëmbimin e përvojave profesionale.

Lidhja e Arsimtarëve dhe Prindërve Shqiptarë (LAPSH) në Bavari organizoi seminarin treditor me temën “Trajnimi dhe shkëmbimi i përvojave në mësimdhënie në klasa heterogjene”, i mbajtur nga 26 deri më 28 qershor në Dachau, afër Mynihut, transmeton albinfo.ch.

Aktiviteti u realizua me mbështetjen e Drejtorisë së Diasporës pranë Ministrisë së Punëve të Jashtme dhe Diasporës së Republikës së Kosovës dhe kishte për qëllim ngritjen profesionale të mësuesve, si dhe përmirësimin e cilësisë së mësimit plotësues të gjuhës shqipe në diasporë.

Seminari u hap nga kryetari i LAPSH-it në Bavari, Milazim Ukaj, ndërsa moderimi u bë nga sekretarja e shoqatës, Lirie Begisholli. Në aktivitet morën pjesë edhe përfaqësues të institucioneve të Kosovës dhe Shqipërisë, përfshirë Konsullin e Përgjithshëm të Kosovës në Mynih, Afrim Nura, konsullin Afrim Deliu, konsullen e Shqipërisë në Mynih, Miranda Kokona, drejtorin e Drejtorisë së Diasporës, Elis Badalli, si dhe përfaqësuesin e Ministrisë së Arsimit të Kosovës, Osman Beka.

Pjesa profesionale e seminarit u udhëhoq nga profesori dhe drejtori i Gjimnazit “Eqrem Çabej” në Prishtinë, Shemsedin Beqiri, si dhe profesori dhe trajneri i certifikuar i kurrikulës, Lavdim Klinaku. Gjatë ligjëratave u trajtuan temat që lidhen me kurrikulën e mësimit plotësues të gjuhës shqipe, sfidat e klasave heterogjene dhe metodat bashkëkohore të mësimdhënies.

Seminari u karakterizua edhe nga prezantime të mësuesve të LAPSH-it, të cilët ndanë përvojat, praktikat më të mira dhe sfidat me të cilat përballen në procesin mësimor. Organizatorët e vlerësuan këtë si një mundësi të rëndësishme për forcimin e bashkëpunimit profesional dhe shkëmbimin e ideve në shërbim të arsimit shqip në diasporë.

Në përfundim të seminarit, pjesëmarrësve iu ndanë certifikata mirënjohjeje për angazhimin e tyre, ndërsa LAPSH Bavari shprehu falënderim për Drejtorinë e Diasporës pranë MPJD-së, Konsullatën e Kosovës në Mynih, si dhe bizneset shqiptare që mbështetën organizimin e aktivitetit.

Sipas organizatorëve, seminare të tilla janë një investim i rëndësishëm në ruajtjen e gjuhës, kulturës dhe identitetit kombëtar te brezat e rinj shqiptarë që jetojnë dhe arsimohen në diasporë./Albinfo.ch

---