Kurti thërret mërgimtarët të vijnë në Kosovë për “kafen e fitores” më 9 shkurt

"Ejani të pimë së bashku një kafe për fitoren dhe të festojmë gjithë natën e 9 shkurtit", ka thënë veç tjerash ai, përmes entuziazmit të publikut

Në një atmosferë përplot emocione, para një publiku në numër të madh, në Event Halle 622 të Cyrihut, është zhvilluar takimi i radhës i fushatës zgjedhore të Lëvizjes Vetëvendosje, me moton “Cep më cep”.

Kreu i VV dhe kryeministri i Kosovës, Albin Kurti është pritur me thirrje dhe brohoritje emotive nga ithtarët e tij dhe të partisë së tij në sallë. Dhe ai u është përgjigjur atyre me një fjalim të zjarrtë, duke përmbyllur takimin në të cilin ka pasur edhe fjalime të tjera dhe pika muzikore.

Tubimiun e ka moderuar shkrimtarja dhe aktivistja e njohur shqiptare nga Zvicra, Shqipe Sylejmani.

Në sallë ka qenë edhe zëvendësministrja Donika Gërvalla, njëherësh kryetare e partisë Guxo që garon në kuadrin e Listës Vetëvendosje.

Tubimin  e ka hapur Qëndresa Hoxha Sadriu, kryetare  e Qendrës së VV për Zvicër, e cila u ka kujtuar të pranishmëve “rëndësinë e veçantë” që ka votimi më 9 shkrurt dhe sidomos votimi i Lëvizjes Vetëvendosje. Ajo po ashtu ka sqaruar edhe mënyrën që duhet ndjekur për të votuar nga diaspora. Ngjashëm me të ka folur edhe kryetarja e Qendrës së VV-së për Gjermani, Sabile Aliu. Ajo ka vënë theksin në domosdonë që kësaj here të votohet ehde më masivisht në mënyrë që Lëvizja Vetëvendosje të përsërisë suksesin e vitit 2021.

Me një fjalim u është drejtuar edhe miku i shqiptarëve dhe i Kurtit, kryetari i PS-së së Zvicrës, Cedric Wermuth. Ai ka folur për situatën aktuale politike botërore, me fokus të veçantë në rrezikun nga rritja e forcave të ekstremit të djathtë gjithandej në vendet perëndimore, që kulmoi, sipas tij, me zgjedhjen e Trumpit, president të SHBA-së.

Një fjalë e ka mbajtur edhe kandidatja e këtyre zgjedhjeve, këngëtarja e njohur Edona Llalloshi. Ajo ka përshëndetur publikun e diasporës dhe e ka lutur atë t`i japë votën asaj dhe VV-sëpastaj ka kënduar dy këngë.

Me një këngë dhe dy valle është paraqotur edhe Ansambli “Vatra” nga Bylahu, Cyrih.

Ngjitja në skenë e Albin Kurtit është pritur me brohoritje dhe duartrokitje nga të pranishmit. Ai, në fjalimin e tij të gjatë dhe të frymëzuar ka folur për arritjet e qeverisjes së tij katërvjeçare të cilat i ka karakterizuar si “të jashtëzakonshme” dhe të pakontestueshme, në të gjitha sferat e jetës. Kurti me këtë rast ka përmendur shifra dhe listime të ndryshme që e tregojnë qeverisjen e tij në një dritë shumë superiore në krahasim me qeveritë e mëparshme.

Këtu nuk ka mundur të mungojë sigurisht, vendosja e rendit dhe sovranitetit të shtetit në veri, shumëfishimi i investimeve për mbrojtjen e vendit gjegjësisht për FSK-në, subvencionet që shteti ka dhënë për shtresat e varfra, investimet kapitale etj.

Në përmbyllje të fjalës së tij, i ndërprerë nga brohoritjet “Kurti”, “Vetëvendosje” dhe “118”, ai u ka bërë thirrje bashkatdhetarëve që të vijnë në Kosovë për të votuar, më 9 shkurt. “Ejani të pimë së bashku një kafe për fitoren dhe të festojmë gjithë natën e 9 shkurtit”, ka thënë veç tjerash ai, përmes entuziazmit të publikut që kishte mbushur sallën.

---