Kryeministri i Mbretërisë së Bashkuar i kërkon Kinës të pozicionohet

Johnson ka thënë tha se lufta në Ukrainë ka ekspozuar një “ndarje të ashpër midis së mirës dhe së keqes”, andaj i ka bërë thirrje Kinës që të dënojë pushtimin rus.

Në një intervistë me gazetën Sunday Times, Johnson tha se ta mbështesësh Rusinë është e ngjashme me zgjedhjen e anës së gabuar në Luftën e Dytë Botërore, duke e përshkruar atë si një betejë midis së mirës dhe së keqes.

“Me kalimin e kohës dhe me rritjen e numrit të mizorive ruse, mendoj se bëhet gjithnjë e më e vështirë dhe politikisht e turpshme për njerëzit që të miratojnë pushtimin e Putinit, qoftë në mënyrë aktive ose pasive,” i tha ai gazetës.

Por ai tha se besonte se Pekini ka filluar të ketë “mëdyshje” për pozicionin e tij neutral.

Kina ende nuk i ka dënuar veprimet e Rusisë dhe është raportuar se Moska i ka kërkuar ndihmë asaj. Të premten, presidenti amerikan Joe Biden paralajmëroi Kinën se do të kishte “pasoja” nëse do t’i ofronte ndihmë Rusisë.

Të shtunën, ministri i jashtëm kinez, Wang Yi, e quajti pozicionin e vendit të tij “objektiv dhe të drejtë”, duke shtuar se nuk do t’i përgjigjen presionit të jashtëm për këtë çështje.

“Koha do të tregojë se qëndrimi kinez është në anën e duhur të historisë,” tha ai.