Kosovë: Një i prekur nga COVID 19, në gjendje të rëndë

Katër të tjerë po trajtohen me oksigjenoterapi

Në Klinikën Infektive janë duke u trajtuar 8 pacientë me COVID-19, prej tyre 4 janë me oksigjenoterapi dhe një është në gjendje më të rëndë.

Infektologu i Klinikës Infektive, Murat Mehmeti, për mediat kosovare ka thënë se kanë dukshëm më pak pacient me COVID19 që po trajtohen aty.

Gjendja e atyre që po trajtohen është stabile, përveç njërit që është më rëndë, ka thënë ai.

“Për momentin i kemi në Klinikë 14 raste, një numër dukshëm më i vogël në krahasim me ditët e kaluara për fat të mirë dhe prej këtyre rasteve, 8 raste edhe më tutje janë COVID pozitivë, janë 5 raste COVID negativë dhe është një rast në pritje të rastit. Sa i përket gjendjes së këtyre pacientëve, në përgjithësi është stabile, përjashtuar një paciente, e cila është në gjendje më të rëndë për faktin se ajo përveç COVID virusit pozitiv, ka edhe probleme me veshka, është me hemodializë të rregullt, ka probleme me zemër dhe ka probleme me pagjakësi dhe të gjitha këto probleme sigurisht që e rëndojnë gjendjen e përgjithshme të saj. Sido që të jetë, gjendja e saj është stabile, mirëpo shpresojmë që ajo të shkojë në përmirësim e sipër. Pacientja është e moshës mesatare”, tha ai.

Murati njoftoi se gjatë ditës së sotme nuk është liruar asnjë pacient, pasi kanë pasur ende nevojë për trajtim mjekësor.

Deri në këto momente në Kosovë me COVID-19 kanë rezultuar pozitiv 862 persona, prej tyre 622 janë shëruar dhe 28 persona kanë humbur jetën.

---