Kosovarët nuk po shkojnë më në xhihad

Autoritetet kosovare të sigurisë nuk kanë regjistruar asnjë rast të përfshirjes së qytetarëve të vendit si xhihadistë në Lindjen e Mesme.

Më shumë se një vit asnjë rast nuk është regjistruar ndërsa autoritetet vendore e konsiderojnë këtë fenomen si pasojë e masave të ndërmarra në vazhdën e luftës kundër terrorizmit dhe radikalizmit ekstrem.

Siç raporton Radio Evropa e Lirë nga Prishtina me përfshirjen e shtetasve të saj në konfliktet e këtyre vendeve, Kosova ishte përballur që në 2012-n.

Nga regjistrimet e deritanishme, rezulton se gati 316 vetë kanë marrë pjesë në konfliktet në Lindjen e Mesme, ndërsa në zonat e luftës besohet se ndodhen edhe 140 të tjerë. 117 persona llogaritet të jenë rikthyer në Kosovë prej andej.

Profesori i sociologjisë së besimit, Ismajl Hasani i gjen arsyet e këtyre largimeve tek indoktrinimi i gjatë i disa klerikëve në mënyrën e predikimit nëpër institucionet fetare dhe terreni i lidhur me bazën socio-ekonomike të popullatës.

Në vitin 2015, Kuvendi i Kosovës në Prishtinë kishte miratuar një ligj për parandalimin e përfshirjes në luftërat e huaja, ligj ky i cili parashikon dënime deri në 15 vjet heqje lirie për të gjithë ata që marrin pjesë, nxisin apo mbështesin përfshirjen në konfliktet jashtë vendit.