Kosova shënoi Ditën Ndërkombëtare të Romēve

Kosova shënoi sot Ditën Ndërkombëtare të Romëve me premtimet për avancimin e të drejtave të këtij komuniteti.

Presidentja Vjosa Osmani priti në takim përfaqësuesit e komunitetit rom në Qeveri, Kuvend dhe shoqëri civile.

Ajo i ka uruar për këtë ditë dhe ka theksuar se nuk mjafton që vetëm në ditë të tilla t’i drejtojmë sytë kah komuniteti rom.

Osmani i siguroi bashkëbiseduesit se dyert e Presidencës do të jenë përherë të hapura për komunitetin rom për t`i kuptuar dhe adresuar nevojat e tyre.

Në nder të 50 vjetorit të Ditës Ndërkombëtare të komunitetit Rom, edhe Kryeministri i Republikës së Kosovës, Albin Kurti priti në takim një delegacion nga ky komunitet, i përbërë nga deputeti Erxhan Galushi, zëvendësministri për Kthim dhe Komunitete, Gazmend Salijević, zëvendësministri i Kulturës, Rinisë dhe Sportit, Sejnur Veshall dhe përfaqësues të shoqërisë civile, me ç’rast ua uroi atyre dhe të gjithë komunitetit Rom, Ditën Ndërkombëtare të Romëve.

Në përvjetorin jubilar të mbajtjes së Kongresit të Parë të Romëve në Londër më 1971, kryeministri Kurti tha se Kushtetuta dhe ligjet tona, garantojnë njohje të statusit dhe përfaqësimit të komunitetit Rom në parlament, administratë dhe qeveri, në mënyrë shembull për të gjithë botën.

Ai shtoi se Zyra e Kryeministrit dhe qeveria do të angazhohen për të ofruar mundësitë e barabarta, duke ofruar edukim, shëndetësi dhe mbrojtje sociale për të gjithë njësoj e pa dallim, sepse shoqëria jonë është e fortë aq sa kujdeset për më të ndjeshmit