Kosova prezantohet në Festat Konsullore në Lyon, në fokus kultura dhe bashkëpunimi për “Prishtina 2030”

Në sheshin Bellecour, Kosova u përfaqësua me aktivitete diplomatike dhe kulturore, ndërsa stenda e saj mirëpriti kryetarin e Lyonit, Grégory Doucet.

Kosova u përfaqësua me aktivitete diplomatike dhe kulturore në Festat Konsullore të Lyonit, të mbajtura të shtunën, më 26 shtator, në sheshin Bellecour, transmeton albinfo.ch.

Në kuadër të aktivitetit, stenda e Kosovës mirëpriti kryetarin e Lyonit, Grégory Doucet, i cili ishte i shoqëruar nga bashkëpunëtorët e tij për marrëdhënie ndërkombëtare.

 

 

Delegacioni u prit nga ambasadori i Republikës së Kosovës, Lulzim Hiseni, së bashku me konsullin Xhevdet Grainca dhe konsullin e nderit, Roger Forneris.

Gjatë takimit u diskutua për mundësitë e bashkëpunimit ndërmjet Kosovës dhe qytetit të Lyonit, me theks të veçantë te përgatitjet për Lojërat Mesdhetare “Prishtina 2030”.

Me këtë rast, kryetarit Doucet iu dhuruan libri fotografik “Explore Kosovo”, i autorit Bujar Gashi, si dhe broshura zyrtare e “Prishtina 2030”.

 

 

Trashëgimia shqiptare prezantohet nga të rinjtë

Një pjesë e rëndësishme e programit iu kushtua kulturës dhe trashëgimisë shqiptare, të prezantuar përmes të rinjve të shoqatës kulturore “Dardanët” nga Pontarlier.

E themeluar në vitin 1994, shoqata ka më shumë se tri dekada që kontribuon në ruajtjen dhe përcjelljen e trashëgimisë shqiptare në Francë.

Të rinjtë e shoqatës prezantuan një program artistik me temën “Përralla dhe Legjenda”, kushtuar figurës së Adem Jasharit, ndërsa programi vijoi me valle tradicionale dhe patriotike, përfshirë “Vallen e Rugovës”, “Vallen për Pavarësinë e Kosovës” dhe “Vallen e Bilbilave”.

Në organizim u vlerësua edhe kontributi i shoqatës “Iliria” nga Lyoni, me mirënjohje për kryetaren Elisabeta Gjegji-Shehi dhe anëtarët e saj për angazhimin dhe kontributin në organizimin e aktivitetit.

Aktivitetet u përmbyllën me një bashkëbisedim me artisten Oda Haliti dhe studentë kosovarë në Francë.

Festat Konsullore në Lyon shërbyen kështu si një mundësi për prezantimin e kulturës dhe traditës shqiptare, por edhe për forcimin e kontakteve dhe bashkëpunimit ndërmjet Kosovës, komunitetit shqiptar dhe institucioneve franceze./Albinfo.ch

---