Konsullata e Kosovës në Cyrih, urë lidhëse mes Universitetit të Cyrihut dhe atij të Prishtinës

Udhëheqësi i Konsullatës në Cyrih pritet nga Presidenti i Universitetit të Cyrihut, synohet bashkëpunimi me Universitetin e Prishtinës

Udhëheqësi i Konsullatës së Republikës së Kosovës në Cyrih, Sami Kastrati, i shoqëruar edhe nga Këshilltarja në Konsullatë, Shukrije Ramadani, është pritur në një takim të veçantë nga Presidenti i Universitetit të Cyrihut, Prof. Dr. Michael Schaepman dhe Drejtori i Zyrës për Marrëdhënie Ndërkombëtare në po të njëjtin Universitet Dr. Christian Simm.

Në takimin miqësor dhe që llogaritet të jetë i pari në këtë nivel të lartë, diplomati Kastrati nga njëra anë dhe Presidenti i Universitetit të Cyrihut Schaepman nga ana tjetër kanë diskutuar në lidhje me mundësitë e rritjes së bashkëpunimit në mes Universitetit të Prishtinës dhe atij të Cyrihut në fushat specifike dhe që vlerësohen me interes të përbashkët nga të dyja Universitetet, transmeton Albinfo.ch.

Numri i studentëve shqiptarë që kanë ndjekur apo ndjekin studimet në Universitetin e Cyrihut ka shënuar rritje të vazhdueshme nga viti në vit.

---