Kishat zvicerane reagojnë ashpër ndaj detyrimit të priftërinjve për shërbim ushtarak

Keystone

Vendimi i autoriteteve zvicerane për t’i rikthyer priftërinjtë dhe murgjit në shërbimin e detyrueshëm ushtarak ka shkaktuar reagime të forta nga komunitetet fetare. Tre kishat kombëtare të Zvicrës, së bashku me Rrjetin e Kishave Ungjillore, i kanë dërguar një letër Këshillit Federal, ku shprehin pakënaqësinë e tyre dhe kërkojnë masa korrigjuese.

Në letrën e dërguar të mërkurën, kishat kritikojnë faktin se Qeveria nuk i konsultoi ato para ndryshimit të ligjit ushtarak, ndonëse kjo është praktikë e zakonshme në Zvicër edhe për ndryshimet më të vogla ligjore. Sipas tyre, ato nuk u informuan fare, megjithëse heqja e përjashtimit nga shërbimi ushtarak për klerin ndikon drejtpërdrejt në misionin e tyre gjatë situatave të krizës.

Ligji i ri ushtarak, i cili hyri në fuqi më 1 qershor, u miratua nga Parlamenti pa u vënë re ky ndryshim specifik. Ndërkohë, dispozita të tjera të ligjit kanë nxitur gjithashtu debat publik.

Komunitetet fetare shprehen veçanërisht të shqetësuara sepse, sipas tyre, Këshilli Federal nuk e konsideron më kujdesin shpirtëror dhe mbështetjen pastorale si shërbime thelbësore për popullsinë.

“Kjo është krejtësisht e pakuptueshme”, thuhet në reagimin e kishave.