Këto janë vendet në Zvicër që kanë ngritur alarmin për shkak të të nxehtit

Një numër paralajmërimesh për nxehtësinë mbeten në fuqi në gjithë Zvicrën, pasi temperaturat në disa zona pritet të arrijnë deri në 37 gradë Celsius.

Të mërkurën një paralajmërim i nxehtësisë së nivelit 4 me ‘rrezik të lartë’ u lëshua nga MeteoSwiss në pjesë të Zvicrës jugore dhe perëndimore, ndërsa një alarm portokalli i nivelit 3 për ‘rrezik të konsiderueshëm’ u njoftua për zona të mëdha të vendit, shkruan The Local.

Temperaturat deri në 37 gradë Celsius priten të mërkurën në Gjenevë, ndërsa në zonat e tjera pritet të lëvizin rreth 35 gradë Celsius. Në Cyrih u parashikuan temperaturat maksimale prej 33 gradë Celsius.

MeteoSwiss tha se një rekord i temperaturës për gjysmën e dytë të gushtit u regjistrua të martën në disa vende, duke përfshirë Cyrih (34.7C) dhe Gjenevë (36.7), përcjell albinfo.ch.

Ndërkohë, temperatura më e lartë e gushtit u regjistrua në stacionin e motit në Disentis, Graubünden, ku merkuri arriti në 32.8C.

Temperaturat nuk kanë zbritur nën 30C gjatë ditës në shumë vende që nga e premtja e kaluar.

Dhe, ka pasur edhe ‘net tropikale’ – kur temperatura nuk bie nën 20C gjatë natës, duke e bërë shumë të pakëndshme për të fjetur.

Por vala e të nxehtit do të përfundojë së shpejti.

Të premten do të bëhet gjithnjë e më pak më e ftohtë me një maksimum prej 30C në Cyrih dhe 32C në Gjenevë, shkruan The Local.

Të shtunën pritet që temperaturat të bien në mënyrë dramatike, me rreth 22 gradë Celsius në veri.

Në jug, merkuri ka të ngjarë të bjerë nën 30C në fundjavë – Lugano parashikohet të shohë 28C dhe Gjenevë 25C. Por, në gjithë vendin priten reshje të dendura shiu dhe stuhi, veçanërisht në jugperëndim.

Nga e diela e tutje do të jetë edhe më e freskët – në Cyrih mezi do të arrijë 20C gjatë ditës, dhe në Bernë vetëm 19C, përcjell albinfo.ch.

Dhe në jug, gjithashtu, vera e nxehtë do të pushojë: Gjeneva dhe Sioni do të kenë një maksimum prej 22 gradë Celsius, ndërsa Lugano do të jetë më e ngrohta në 24 gradë Celsius. Sërish priten shira.

Sipas MeteoSwiss, zhvillimi i motit nga e hëna e tutje është mjaft i pasigurt, por duket se do të jetë më i freskët për një kohë.

---