Këtë sezon, Zvicra me gjashtë lojtarë në Serie A

(KEYSTONE/Michael Buholzer).

Mësohet se këtë sezon, gjashtë futbollistë të Zvicrës janë në Serie A. Katër prej tyre u janë bashkuar klubeve elitare italiane së fundi, përcjell albinfo.ch.

Zyrtarisht numri i lojtarëve të Zvicrës në Itali është trefishuar. Pos Ricardo Rodriguezit (Torino) dhe Michel Aebischer (Bologna) tani në kampionatin italian paraqiten edhe Yann Sommer (Inter), Noah Okafor (Milan), Remo Freuler e Dan Ndoye (Bologna). Vetëm Bundesliga është e prezantuar më shumë në ekipin e përzgjedhësit Murat Yakin.

“Është njëra prej top-pesë ligave. Niveli është shumë i lartë. Shumë skuadra luajnë në gara evropiane”, ka thënë Noah Okafor, që është transferuar nga Salzburgu te Milani. “Për këtë arsye Italia është mundësi e mirë për shumë lojtarë për të bërë hapin tutje në karrierë”.

Por jo vetëm aspekti sportiv e bën Italinë tërheqëse për lojtarët, ka thënë Okafor.

“Kam qenë në qytet me prindërit e mi dy apo tri herë. Milani është qytet kosmopolitan. Të gjithë që e duan ushqimin, e dinë sa mirë është këtu. Por, unë jam në Itali për të luajtur futboll”. Zvicra i ka shumicën e lojtarëve në ligat e mëdha evropiane. Dhe, ky është dallimi më i madh i kësaj përfaqësuese me Kosovën, krahas qasjes profesionale. Kosova i ka vetëm gjashtë lojtarë në top-ligat evropiane. Njëri prej tyre, Aro Muriq, është vetëm rezervist. Lojtarët e tjerë të Kosovës janë në liga më të “vogla”, shumica në atë të Turqisë. Zvicra udhëheq në grupin kualifikues për Euro 2024 me dhjetë pikë nga katër ndeshje. Kosova ka vetëm tri pikë nga katër ndeshje. Është e parafundit dhe në kërkim të fitores së parë.