Kërkohet aprovimi i Projektligjit për mbrojtjen e fëmijëve

Koalicioni i OJQ-ve për Mbrojtjen e Fëmijëve i është drejtuar kryeministrit Ramush Haradinaj m një letër, nga i cili kërkon që të merren masa për rritjen e sigurisë dhe mbrojtjen e fëmijëve, transmeton albinfo.ch.

KOMF thotë se shkas për këtë letër janë bërë rastet e fundit të paprecedent të dhunës që kanë rezultuar dhe me humbjen e jetës së fëmijëve në Kosovë. “Fëmijët në Republikën e Kosovës përbëjnë 30% të popullsisë së përgjithshme. Fëmijët po ballafaqohen me situata të vështira, rreziqe, dhunë, kërcënime dhe kanosje të sigurisë së tyre, ku për pasojë kemi edhe raste të cilat po përfundojnë me fatalitet deri në vrasje. Rastet e fundit të humbjes së jetës së fëmijëve, të cilat tronditën gjithë opinionin nga shkalla e lartë e përdorimit të dhunës në familje, dhunës mes bashkëmoshatarëve, përdorimit të armëve, vetëvrasjeve të fëmijëve, duhet të përbëjnë alarm për Qeverinë, institucionet, familjet dhe gjithë shoqërinë”, thuhet në letrën e kësaj organizate.

Të dhënat në Kosovë flasin për shkallë të lartë të dhunës së përdorur në familje, ku 61.4 për qind e fëmijëve deri në moshën 14 vjeç kanë deklaruar të kenë pësuar nga dhuna psikologjike dhe fizike. KOMF-i kërkon aprovimin sa më parë të Projektligjit për mbrojtjen e fëmijëve si dhe parashikimin e ndarjes së buxhetit të nevojshëm për këtë projektligj.