KEDS-i dënohet me 30.000 euro për gjashtë njehsorë me afat të skaduar

Foto FB: Ministria e Industrisë, Ndërmarrësisë, Tregtisë dhe Inovacionit

Ministria e Industrisë, Ndërmarrësisë, Tregtisë dhe Inovacionit, ka njoftuar sot se e ka gjobitur me 30 mijë euro Kompaninë Kosovare për Distribuim të Energjisë Elektrike, si dhe e ka urdhëruar t’i dëmshpërblejë konsumatorët e dëmtuar, pasi ka gjetur se ka njehsorë elektrikë me afat të skaduar.

“Ky veprim është ndërmarrë në kuadër të aktiviteteve të vazhdueshme të verifikimit të njehsorëve elektrikë në të gjithë territorin e Kosovës”, thuhet në njoftim.

Sipas ministrisë, Komisioni i saj Verifikues po vazhdon punën në terren në shtatë regjionet e vendit, me qëllim të gjetjes dhe adresimit të çdo parregullsie, pas ankesave të pranuara nga konsumatorët të shumtë teksa u tha se analizat e deritanishme laboratorike, të kryera në Agjencinë e Metrologjisë së Kosovës, kanë vërtetuar pasaktësi në regjistrimin e orës dhe datës në njehsorët e testuar, transmeton albinfo.ch.