Kantoni St. Gallen pret diplomatët nga Kosova

Njëri ndër kantonet më të mëdha në Konfederatën Zvicerane, të premten kishte për vizitë disa mysafirë të veçantë, transmeton albinfo.ch.

Udhëheqësi i Konsullatës së Republikës së Kosovës në Cyrih, z. Sami Kastrati, së bashku me Këshilltaren, znj. Shukrije Ramadani dhe Sekretaren e Dytë, znjsh Bahrije Sylejmani, janë pritur nga Sekretari shtetëror i Kantonit St.Gallen, Dr. Benedikt van Spyk dhe Udhëheqësja e Kantonit për Marrëdhënie me Jashtë, znj Sarah Hauser.

Shqyrtimi i mundësive të thellimit dhe zgjerimit të mëtejmë të bashkëpunimit në çështje ekonomike, atë të edukimit dhe kulturës; binjakëzimi eventual i qyteteve të këtij Kantoni dhe atyre nga Kosova si dhe integrimi i shqiptarëve të Kosovës në shoqërinë dhe institucionet e këtij kantoni, ishin disa nga temat e diskutimit.

“Ishte vërtet një vizitë e këndshme, jashtëzakonisht miqësore dhe me mundësi konkrete të bashkëpunimit në fusha të ndryshme të interesit të përbashkët. Na gëzoi fakti që të dëgjojmë për integrimin e suksesshëm të shqiptarëve nga Kosova, por edhe mbi interesimin e kompanive zvicerane për investime në vendin tonë”, ka thënë diplomati kosovar Kastrati.

Shqiptarët nga Kosova renditen në vendin e katërt për nga numri i të huajve që jetojnë në këtë kanton.