Kantoni i Schwyz-it paralajmëron kundër këtyre faturave tatimore të falsifikuara

Administrata Tatimore e Schwyz-it ka marrë disa njoftime për email-e mashtruese që krijojnë përshtypjen se vijnë nga eTax ose nga vetë autoriteti. Autoritetet kantonale po lëshojnë një paralajmërim.

“Kujdes” – kështu nis njoftimi nga kantoni i Schwyz-it: Autoritetet paralajmërojnë për email-e mashtruese që duket sikur vijnë nga softueri eTax ose nga administrata tatimore e kantonit. Departamenti i Financave i Schwyz-it njoftoi të hënën se tashmë janë raportuar disa raste të tilla mashtrimi pranë administratës tatimore.

Email-et që po qarkullojnë aktualisht përmbajnë, ndër të tjera, mbishkrimin “ETAX.CH”, përdorin një përshëndetje jopersonale dhe dërgohen nga një adresë dërguesi e pasaktë. Autoritetet theksojnë se email-et mashtruese po bëhen gjithnjë e më profesionale dhe se këto karakteristika mund të mos jenë të pranishme në të ardhmen, raporton Blick, transmeton albinfo.ch.

Kërkohet kujdes i veçantë

Duhet treguar kujdes sidomos ndaj mesazheve të papritura që përmbajnë lajme veçanërisht të këndshme ose të pakëndshme dhe që kërkojnë veprime të shpejta. Nuk duhet të klikohet mbi lidhjet (links) që gjenden në email-e të dyshimta. Përkundrazi, vërtetësia e një mesazhi duhet të konfirmohet përmes një kanali të pavarur dhe duke përdorur të dhënat zyrtare të kontaktit të administratës tatimore.

Kantoni i Schwyz-it thekson se deklaratat tatimore dhe njoftimet për pagesë (kujtesat) nuk dërgohen me email, por me postë. “Në rast pasigurie, është e arsyeshme të mos e fshini mesazhin para kohe, por ta dërgoni atë për verifikim te një autoritet kompetent,” shkruan kantoni.

---