Italia fajëson Gjermaninë për krizën e refugjatëve

Foto Twitter: @NewsBlitz30

Kampet e refugjatëve në Lampedusa janë tejmbushur dhe politikanët italianë fajësojnë Gjermaninë për situatën.

Brenda vetëm tre ditëve në fundjavën e dytë të shtatorit, 10,000 refugjatë mbërritën në ishullin e vogël Lampedusa, teksa në gjithë vitin 2014 kishte vetëm 4,000 migrantë që mbërritën në ishullin e vogël – në mbarë vendin ishin 170,000, shkruan 20min.

Për shkak se flota e anijeve italiane të shpëtimit zakonisht duhet të qëndrojë në port me kërkesë të qeverisë, varkat e emigrantëve nuk kapen më në det, por përkundrazi arrijnë në Lampedusa.

Tri anijet e dërguara nga OJQ-të me para nga Gjermania vështirë se mund të ndërhyjnë, sepse qeveria e djathtë e Giorgia Melonit u thotë kapitenëve saktësisht se në cilat porte duhet t’i çojnë refugjatët, përcjell albinfo.ch.

Ministri i Transportit, Matteo Salvini, e përshkruan Gjermaninë si përgjegjëse për faktin se një numër i madh emigrantësh po zbarkojnë sërish në Lampedusa dhe në fund të fundit, vendi paguan për anijet e shpëtimit që nxjerrin “ilegalët” në breg.

Në fakt, asnjë nga 10,000 emigrantët e përmendur nuk mbërriti në një nga anijet e shpëtimit “gjermane”.

Qeveria federale gjermane pezulloi programin e pranimit vullnetar në gusht, por edhe në shenjë proteste kundër faktit që Italia aktualisht po bllokon ripranimin e refugjatëve sipas të ashtuquajturave rregullat e Dublinit.

Sipas këtyre rregullave, Italia do të marrë mbrapsht personat që kanë paraqitur tashmë një aplikim fillestar në Itali dhe janë kapur në Gjermani.