Infermieret nga lindja “ua ulin pazarin” kolegeve zvicerane

Me 1560 franga në muaj, një infermiere polake ofron shërbim tërëditor, për çka një zvicerane kërkon 7500 franga në muaj

Konkurrenca e fuqisë punëtore nga vendet e Evropës linidre përmes pagave më të vogla ose „dumping-u“, ka prekur edhe shëndetësinë e Zvicrës. Kështu, siç shkruan „Nzz am Sonntag“, infermieret nga vende si Polonia, kanë vërshuar „tregun“ e Spitex-it, shërbim shtëpiak për të të moshuar.

Ato po pëlqehen gjithnjë më shumë nga zviceranët e moshuar, në radhë të parë për çmimin shumëfish më të lirë të punës së tyre se sa homologet e tyre zvicerane. Me 1560 franga në muaj, një infermiere polake ofron shërbim tërëditor, ndërkohë që kolegia e saj zvicerane për një punë të ngjashme kërkon rreth 7500 franga në muaj.

„Në kantonin e Tesinës tashmë 70 për qind të shërbimeve ndihmëse shëndetësore private i mbulojnë infermieret nga vendet e lindjes, një e treta e tyre nga Polonia“, i ka thënë gazetës „NZZ am Sonntag“ një përfaqësues i federatës së Spitex-it për këtë kanton.

Gratë në fjalë rekrutohen përmes agjencive përkatëse të jashtme, dhe angazhimi i tyre bën pjesë diku në „zonën e hirtë“ të ligjit.

Ky pozicion pritet të ndryshojë duke fuilluar nga 1 maji, kur marrëveshja për lëvizje të lirë do të jetë e vlefshme edhe për vendet e hyra rishtas në BE.