Incident në Kalanë e Shkupit

Qytetarë shqiptarë në mënyrë spontane u tubuan te Kalaja e Shkupit dhe të revoltuar filluan rrënimin e mureve të objektit

　

Për incidentin e së enjtës mbrëma në Kalanë e Shkupit, ka reaguar kryeministri i Maqedonisë, Nikola Gruevski. Në një komunikatë të lëshuar nga kabineti i kryeministrit maqedonas, thuhet se nuk do të lejohet që kjo situatë të ndikojë në marrëdhëniet ndëretnike. Gruevski, ka vlerësuar se të gjitha çështjet e hapura duhet të zgjidhen përmes dialogut, ndërkaq për situatën e krijuar është komunikuar me partnerët e koalicionit”, thuhet në këtë komunikatë.

Mediet në Maqedoni kanë raportuar se janë penguar punimet e objektit të një kishe të kontestuar në Kalanë e Shkupit. Për këtë ndërtim nuk ishte njoftuar askush ndërsa mbi 50 punëtorë ishin sjellë nga Manastiri, për të filluar punimet.

Punimet kishin filluar të enjten në mbrëmje, ndërsa më pas qytetarë shqiptarë në mënyrë spontane u tubuan për të parë se çka po ndodhë në Kala të Shkupit,　 dhe të revoltuar nga ajo që panë filluan rrënimin e mureve të objektit. Rrënimin nuk arritën ta parandalojnë as prestarët e Ministrisë së Punëve të Brendshme të Maqedonisë.　

Qytetarëve iu kanë bashkangjitur edhe përfaqësues të partive politike shqiptare në Maqedoni. Nënkryetari i BDI-së, Izet Mexhiti, i cili ishte i pranishëm me disa përfaqësues tjerë të partisë, deklaroi se nuk do të lejojnë dikush në këtë mënyrë të ndryshojë historinë e Kalasë së Shkupit.

Nga ana tjetër, kryetari i Demokracisë së Re, Imer Selmani theksoi se Qeveria e Maqedonisë po provokon marrëdhëniet ndëretnike me veprimet tinëzare në Kalanë e Shkupit.

“Mbrëmë në mënyrë tinëzare Qeveria e Gruevskit solli dhjetëra punëtorë për të vazhduar punën në ndërtimin e kishës, larg syve të popullit dhe duke provokuar në palcë komunitetin mysliman, duke hedhur zjarr mbi marrëdhëniet ndëretnike dhe ndërfetare në vend”, theksoi Selmani në një konferencë me gazetarët të organizuar të premten në Kalanë e Shkupit.

　

Lidhur me ndërtimin e kishës së kontestuar në Kalanë e Shkupi kanë reaguar edhe lëvizja “ZGJOHU” dhe shoqata të tjera në Maqedoni.

　

Rindërtimi i një kishte të shekullit 14 në Kalanë e Shkupit ka nxitur reagime politike dhe historike në Maqedoni.

Subjekte shqiptare kanë kërkuar ndërprerjen e ndërtimit duke thënë se kalasë, që simbolizon qytetin, do t’i jepet vetëm karakter i krishterë, me çka do të pretendohet se ajo është pjesë e trashëgimisë maqedonase.

　

　

　

　

---