“Ikea” dhe “Planzer” ofrojnë praktikë pune për refugjatët

Një praktikë e tillë do të fillojë duke angazhuar në secilën qendër të shitjes të Ikea-s nga dy azilkërkues

Zvicra ngadalë po fillon të “zbulojë” potencialin e punës që fshihet te refugjatët. Kështu, ka qenë së pari kolosi i industrisë së mobileve “Ikea” që ka ofruar programe gjashtëmujore të praktikës për azilkërkuesit. Një praktikë e tillë do të fillojë duke angazhuar në secilën qendër të shitjes të Ikea-s nga dy azilkërkues, shkruan “NZZ am Sonntag”.

Ikea ka në Zvicër nëntë qendra të tilla, që i bie se ajo do të marrë për të kryer praktikën 18 refugjatë. Por, siç ka konfirmuar një zëdhënës i firmës, ky numër do të shkojë duke u rritur në të ardhmen.

Angazhimi bëhet sipas kualifikimeve dhe sipas shkallës së njohjes së gjuhës, kryesisht në logjistikë dhe në shitje.

Ndërkohë edhe ndërmarrja për transport dhe logjistikë “Planzer” me seli në Dietikon të Cyrihut ka shprehur interesimin e saj për punësimin e refugjatëve.

“Ne planifikojmë të ofrojmë programe trajnimi për rreth 100 refugjatë” ka thënë për “NZZ am Sonntag” Severin Baer nga stafi drejtues i firmës. Ai ka shtuar se migrantët në fjalë do të aftësohen për logjistikë ose për t`u bërë shoferë kamionësh.

“Bëhet fjalë për një trajnim profesional të natyrës praktike, përmes të cilit do të ofrohen njohuri edhe nga gjuha e vendit dhe nga mënyra e këtushme e jetesës”, ka thënë Baer më tutje. Ai ka theksuar po ashtu se kompania ka vendosur ndërkohë kontakte edhe me Sekretariatin Shtetërore për Migracion (SEM).