Hapet Shkolla Shqipe “URA” në Esslingen për fëmijët e diasporës

Shkolla e re do t'u ofrojë fëmijëve shqiptarë mundësinë të mësojnë gjuhën, historinë, kulturën dhe traditat kombëtare, me mbështetjen e Konsullatës së Kosovës në Shtutgart.

Komuniteti shqiptar në Esslingen është pasuruar me një qendër të re arsimore, pas hapjes zyrtare të Shkollës Shqipe “URA”, e cila do t’u mundësojë fëmijëve të mësojnë gjuhën shqipe, historinë, kulturën dhe traditat kombëtare, shkruan albinfo.ch.

Në ceremoninë e hapjes morën pjesë prindër, nxënës dhe përfaqësues të komunitetit shqiptar. Udhëheqësi i Konsullatës së Përgjithshme të Republikës së Kosovës në Shtutgart, Hamdi Bërbatovci, vlerësoi angazhimin e prindërve dhe të komunitetit, duke theksuar se ruajtja dhe kultivimi i gjuhës amtare mbetet një nga shtyllat kryesore të identitetit kombëtar në diasporë.

Procesi mësimor do të zhvillohet në ambientet e një shkolle lokale në Esslingen dhe do të udhëhiqet nga mësuesja Fortesa Lleshi Ferizi, me mbështetjen e vazhdueshme të komunitetit shqiptar.

Me rastin e hapjes së shkollës, Konsullata e Përgjithshme e Kosovës në Shtutgart shpërndau abetare dhe materiale mësimore për nxënësit, me synimin për të mbështetur mësimin plotësues në gjuhën shqipe, shkruan tutje albinfo.ch.

Në fund, u shpreh mirënjohje për të gjithë ata që kontribuuan në realizimin e kësaj nisme, veçanërisht për mësuesen Fortesa Lleshi Ferizi, Ard Ajdinin, prindërit dhe të gjithë mbështetësit e projektit.

Po ashtu, u bë thirrje që familjet shqiptare në Esslingen dhe rrethinë t’i regjistrojnë fëmijët në Shkollën Shqipe “URA”, duke u bërë pjesë e kësaj nisme të rëndësishme për ruajtjen e gjuhës dhe identitetit kombëtar. /Albinfo.ch

---