Hapet konkursi për mësuesit e diasporës për vitin 2025

Ministria për Evropën dhe Punët e Jashtme (MEPJ) e Shqipërisë ka shpallur hapjen e aplikimeve për regjistrimin në Regjistrin Shtetëror të Mësuesve të Gjuhës dhe Kulturës Shqiptare në Diasporë, për vitin 2025.

Ky proces synon përzgjedhjen e mësuesve që do të angazhohen në ruajtjen dhe promovimin e gjuhës shqipe dhe trashëgimisë kulturore ndër shqiptarët që jetojnë jashtë vendit. Programi është pjesë e angazhimeve institucionale për forcimin e lidhjeve me diasporën dhe për ruajtjen e identitetit kombëtar te brezat e rinj, transmeton albinfo.ch.

Afati për dorëzimin e aplikimeve është deri më 30 shtator 2025. Dokumentet mund të dorëzohen në formë fizike me postë ose në mënyrë elektronike, sipas udhëzimeve të publikuara nga MEPJ.

Të interesuarit mund të gjejnë më shumë informacion mbi kriteret e aplikimit dhe dokumentacionin e nevojshëm në faqen zyrtare të ministrisë:

http://www.punetjashte.gov.al