Gjyqi për djathin “gruyere”

Jo vetëm djathi i prodhuar në rajonin e Gruyere të Zvicrës dhe Francës mund të quhet “gruyere”. Gjykata e Virxhinias në Shtetet e Bashkuara të Amerikës ka vendosur që të lejojë që “gruyere” të emërohen edhe djathrat që prodhohen jashtë këtij rajoni.

Gjykata e Apelit arsyetoi se në SHBA nuk vlejnë të njëjtët rregulla për përcaktimin e origjinës së ushqimit sikur në Evropë.

Vendimi thotë se “gruyere” mund të përdoret ligjërisht për të përshkruar djathin, pavarësisht se ku është prodhuar. “Djathi – pavarësisht vendit të tij të prodhimit – është etiketuar dhe shitur si gruyere në Amerikë për dekada të tëra”, thuhet në vendim, raporton BBC, përcjellë Albinfo.ch. Ky vendim cilësohet si triumf nga prodhuesit e qumështit në Amerikë.

Në gjykatë po ashtu u vendos se grupet franceze dhe zvicerane që po vazhdojnë përpjekjet e tyre për ta mbrojtur emrin “nuk mund të tejkalojnë faktin se konsumatorët e djathit në Shtetet e Bashkuara e quajnë “GRUYERE” një lloj djathi, gjë që e bën termin gjenerik”, shkruan BBC, përcjellë Albinfo.ch

Administrata Amerikane e Ushqimit dhe Barnave ka disa standarde që duhen përmbushur për ta quajtur djathin “gruyere” – ai duhet të ketë “vrima të vogla” dhe të jetë i vjetërsuar për të paktën 90 ditë.