Gjermania porosit municione për tanket e Ukrainës

(KEYSTONE/DPA/Federico Gambarini)

Gjermania porositi municione të reja për tanket antiajrore ”Gepard” për Ukrainën, njoftoi sot ministri i Mbrojtjes i vendit, Boris Pistorius, në selinë e NATO-s në Bruksel.

“Kjo do të thotë që ne tani do të rifillojmë menjëherë prodhimin tonë në kompaninë ‘Rheinmetall’ për municionet e ‘Gepard”, tha Pistorius.

”Gjermania i nënshkroi kontratat e porosisë në emër të Ukrainës”, sipas Ministrisë gjermane të Mbrojtjes, transmeton dpa, përcjell albinfo.ch.

Një urdhër nga vetë Berlini do të kishte marrë shumë kohë dhe do të kishte përfshirë Parlamentin gjerman.

Pistorius tha se kontratat e reja të municioneve sigurojnë dërgesa më të shpejta dhe më të pavarura.

”Tanket kundërajrore i shërbejnë mirë Ukrainës, vlerësohen shumë nga ushtarët e vendit dhe janë efektive veçanërisht në mbrojtjen me dron”, tha Pistorius.

Ministria e Mbrojtjes tha se Gjermania deri më tani ka dorëzuar 32 tanke ”Gepard” në Ukrainë që nga vera e vitit 2022.