Gati 12 mijë rrufe godasin Zvicrën brenda një nate

Kjo e bën 9 shtatorin një nga ditët e shtatorit me numrin më të madh të rrufeve të regjistruara në vend

Zvicra ka kaluar një natë me stuhi të fuqishme, ndërsa e mërkura pritet të jetë një nga ditët e shtatorit me aktivitetin më të madh të rrufeve të regjistruar ndonjëherë.

Gati 12 mijë rrufe janë regjistruar në Zvicër deri të mërkurën në mëngjes, sipas të dhënave të Zyrës Federale të Meteorologjisë dhe Klimatologjisë, MeteoSwiss.

Kjo e bën 9 shtatorin një nga ditët e shtatorit me numrin më të madh të rrufeve të regjistruara në vend, transmeton albinfo.ch.

Stuhitë janë shoqëruar edhe me erëra shumë të fuqishme. Në Steckborn, në kantonin Thurgau, janë regjistruar erëra deri në 110 km/h, ndërsa në Koppigen të Bernës ato arritën në 101 km/h. Shpejtësia më e lartë u regjistrua në Hörnli, në kantonin e Cyrihut, ku erërat arritën në 116 km/h.

Pavarësisht intensitetit të stuhive dhe numrit të madh të rrufeve, deri në orët e para të mëngjesit nuk kishte raportime për dëme.

Aktiviteti i lartë i rrufeve nuk është i pazakontë për Zvicrën. Gjatë verës 2026 janë regjistruar 22,158 rrufe që kanë goditur tokën, ndërsa Zvicra renditet e dyta në Evropë për dendësinë e goditjeve të rrufeve në raport me sipërfaqen e vendit.

---