Gashi e Kumbaro  flasin për projektin “Ditët e Kulturës Shqiptare në Diasporë”

"Koncentrimi do të jetë në projektin tashmë të njohur Ditët e Kulturës Shqiptare në Diasporë, ku koordinimi në organizimin e aktiviteteve të përbashkëta kulturore është i domosdoshëm”

Ministri i Diasporës, Dardan Gashi, në vizitën e parë zyrtare në Shqipëri është pritur nga ministrja e Kulturës, Mirela Kumbaro, transmeton albinfo.ch.

“Pa dyshim që na presin aktivitete dhe organizime të shumta, me të cilat së bashku do të mund të përçojmë kulturën shqiptare në formën më të mirë”, citohet të ketë thënë Kumbaro. Nga ana tjetër, Gashi e njoftoi ministren Kumbaro me planet e Ministrisë së Diasporës dhe Investimeve Strategjike në fushën e ruajtjes të identitetit dhe kulturës shqiptare në diasporë.

“Bashkëpunimi gjithsesi do të intensifikohet, ndërsa koncentrimi të jetë në projektin tashmë të njohur Ditët e Kulturës Shqiptare në Diasporë, ku koordinimi në organizimin e aktiviteteve të përbashkëta kulturore është i domosdoshëm”, theksoi ministri Gashi.