Futbollisti shqiptar shënon për Zvicrën U-17

Kombëtarja e Zvicrës U17 ka shënuar fitore të rëndësishme në kuadër fazës përfundimtare të Kampionatit Evropian që po mbahet në Angli, nga data 4-20 maj i këtij viti.

Në ndeshjen e dytë të grupit, në të cilin bëjnë pjesë edhe nikoqiri Anglia, Italia dhe Izraeli, Zvicra ka mposhtur këtë të fundit me rezultat të thellë 3:0. Golat për helvetët i shënuan Mambimbi në minutat 10 e 38, si dhe futbollisti zviceran me rrënjë shqiptare, Tician Tushi në minutën 47.

Ndeshjen e parë kundër italianëve, Zvicra e humbi me rezultat 2:0 dhe pas dy xhirove të luajtura, ndan vendin e dytë me Italinë me nga tre pikë.

Për momentin Anglia është lider i tabelës me dy ndeshje të fituara me rezultat identik 2:1, ndaj Italisë dhe Izraelit.