Foshnja 1-vjeçare në burg me nënën, e reja shqiptare u arrestua në kthim nga Gjermania

E reja shqiptare arrestohet pas kthimit nga Gjermania, foshnja 1-vjeçare me të në burg

Një fëmijë vetëm 1 vjeç është dërguar sot në Institucionin e Ekzekutimit të Vendimeve Penale në Pojskë, ku do të qëndrojë pranë nënës së tij, e cila po vuan një dënim prej dy muajsh burg, transmeton albinfo.ch.

34-vjeçarja u arrestua një ditë më parë në Pikën e Kalimit Kufitar të Murrqanit, teksa po kthehej nga Gjermania, në zbatim të një vendimi gjyqësor të formës së prerë, të dhënë në mungesë në vitin 2023, për veprën penale “Dhunë në familje” ndaj vjehrrit të saj.

Sipas familjarëve, gruaja është nënë e tre fëmijëve të mitur. Njëri prej tyre është 4 vjeç dhe ka probleme shëndetësore, i dyti është 2 vjeç, ndërsa më i vogli, vetëm 1 vjeç, është dërguar pranë nënës në institucionin e vuajtjes së dënimit.

Familjarët pretendojnë se vjehrri e ka falur 34-vjeçaren dhe se dënimi prej dy muajsh duhej të ishte përfshirë në ligjin e amnistisë. Megjithatë, institucionet përgjegjëse kanë zbatuar urdhrin për ekzekutimin e vendimit gjyqësor.

Aktualisht, 34-vjeçarja po vuan dënimin në burgun e Pojskës, ndërsa fëmija 1-vjeçar po qëndron me të në institucion.

Ndërkohë, gjatë ditës së sotme pritet që Avokati i Popullit të vizitojë burgun e Pojskës për t’u takuar me 34-vjeçaren dhe për t’u njohur nga afër me rrethanat e rastit, si dhe me kushtet në të cilat po qëndron fëmija së bashku me nënën e tij./Albinfo.ch 

---