Fillojeta Makshana shpallet më e mira në gjuhën gjermane në komunën e Payernit të Zvicrës

Nxënësja shqiptare nga Payerne u vlerësua me çmim për mesataren më të lartë në gjuhën gjermane në nivelin VG 1, duke u dalluar për suksesin e saj akademik.

Një tjetër arritje e bukur nga të rinjtë shqiptarë në Zvicër. Fillojeta Makshana është nderuar me çmim për rezultatin më të mirë në gjuhën gjermane në nivelin VG 1, në kuadër të ceremonisë së promovimeve të Etablissement secondaire de Payerne et environs, e mbajtur më 26 qershor 2026 në Payerne, transmeton albinfo.ch.

Çmimi i është ndarë Fillojeta Makshanës për mesataren më të lartë në gjuhën gjermane (Prix pour la meilleure moyenne d’allemand VG niveau 1), një vlerësim që dëshmon përkushtimin, punën dhe suksesin e saj në procesin arsimor.

Ky vlerësim u dhurua nga Erne AG – Holzbau, ndërsa diploma u lëshua nga institucioni arsimor zviceran, Etablissement secondaire de Payerne et environs.

Suksesi i Fillojeta Makshanës është një shembull frymëzues për bashkëmoshatarët e saj dhe një dëshmi e rëndësisë së përkushtimit ndaj arsimit. Arritje të tilla të të rinjve shqiptarë në diasporë vazhdojnë të tregojnë potencialin dhe angazhimin e brezit të ri në vendet ku jetojnë dhe shkollohen./Albinfo.ch

---