Festë e tifozëve shqiptarë në Zvicër

Ethet dhe emocionet e ndeshjes ndërmjet Serbisë dhe Shqipërisë i kapluan edhe shqiptarët e Zvicrës.

Disa kishin vendosur që ta përcjellin në shtëpi me familje, e disa të tjerë kishin zgjedhur që ta shikonin lojën nëpër lokale dhe klube të ndryshme shqiptare në Zvicër.

Në klubin “Iliria” në Regensdorf ishin mbledhur dhjetëra tifozë të kombëtares shqiptare dhe sapo loja filloi, bashkë me të filloi ndjenja e fitores.

“O sa mirë të jesh shqiptarë. Është me të vërtetë ndjenjë e mirë që të vishesh kështu kuq e zi dhe mendoj se shqiptarët këtu në diasporë e donë vendlindjen më shumë se ata që janë në vendlindje”, tha Kushtrim Sylejmani.

Loja filloi me një dominim të kombëtares serbe në fillim dhe sa herë që merrnin topin në posedim shqiptarët, atmosfera ndizej në klubin “Iliria”. Në mes të brohoritjeve “Shqipëri etnike” dhe në mes të ngjyrave që dominonin e kuqja dhe e zeza, me plis në kokë Refik Syla dhe Adnan Maliqi kishin dalë ta përcillnin gjithashtu lojën.

Në mes të atmosferës së nxehtë këta për albinfo.ch thanë se janë emocionuar në 30 minutat e parë, kur kombëtarja krijoi disa raste para portës, por në 15 minutat e fundit të pjesës së parë ishin me të vërtetë të veçantë për kombëtaren shqiptare. Jo vetëm rastet për shënim kishin emocionuar, por kulmi i emocioneve u arrit në minutën e 42-të, kur fluturakja në mes të stadiumit valëviti flamurin shqiptar. Me këtë rast edhe shpërthen tensioni në fushë dhe tifozët serbë, të cilët reaguan duke hedhur gjësende në fushë dhe sulmuan lojtarët musafirë.

V.K