Falimenton kompania zvicerane pas 66 vitesh, 30 punëtorë mbesin pa punë

Kriza godet industrinë e metalit, kompania zvicerane shpall falimentimin.

Një tjetër kompani zvicerane me traditë i ka dhënë fund aktivitetit të saj. Zeba Tech, me seli në Amriswil të kantonit Thurgau, ka shpallur falimentimin pas 66 vitesh funksionimi, duke lënë pa punë rreth 30 punonjës, përcjell albinfo.ch.

Kompania, e themeluar në vitin 1960 dhe e specializuar në përpunimin e metaleve, nuk ka arritur t’i përballojë vështirësitë e vazhdueshme në treg. Sipas raportimeve, industria zvicerane e metaleve po përballet me presion të madh nga konkurrenca ndërkombëtare, ndërsa frangu i fortë zviceran ka vështirësuar edhe më shumë pozitën e prodhuesve vendas.

Shumë klientë kanë zgjedhur produkte më të lira nga vende si Polonia dhe Çekia, duke lënë në disavantazh kompanitë zvicerane, pavarësisht cilësisë së lartë që ofrojnë.

Falimentimi i Zeba Tech prek drejtpërdrejt 30 punonjës, të cilët do të humbin vendet e tyre të punës gjatë vitit 2026. Megjithatë, për ta ka ardhur edhe një lajm shpresëdhënës.

Një kompani konkurruese ka shprehur interes për të punësuar një pjesë të stafit të Zeba Tech, duke u ofruar atyre mundësinë për të vazhduar karrierën në të njëjtin sektor.

Rasti i Zeba Tech shihet si një tjetër sinjal i sfidave me të cilat po përballet industria prodhuese në Zvicër, ku kostot e larta të prodhimit dhe konkurrenca nga tregjet me çmime më të ulëta po ushtrojnë presion të madh mbi ndërmarrjet vendase. /Albinfo.ch

---