Edukimi pa dhunë në Zvicër: Një shuplakë nuk është kurrë e shëndetshme

Në Zvicër ka hyrë në fuqi dispozita e re në Kodin Civil që sanksionon të drejtën për një edukim pa dhunë. Me këtë ndryshim ligjor, ndëshkimi trupor dhe çdo trajtim poshtërues ndaj fëmijëve marrin një refuzim të qartë juridik dhe shoqëror.

Qendrat për mbrojtjen e fëmijëve e kanë vlerësuar këtë hap si të rëndësishëm për forcimin e të drejtave të fëmijëve dhe mbrojtjen e tyre nga dhuna në familje. Sipas specialistëve, dhuna në edukim dëmton seriozisht zhvillimin e fëmijës dhe nuk mund të justifikohet në asnjë formë.

Nga Qendra për Mbrojtjen e Fëmijëve në St. Gallen theksohet se rritja e rasteve të raportuara nuk nënkupton domosdoshmërisht më shumë dhunë, por më shumë ndërgjegjësim dhe gatishmëri për të kërkuar ndihmë. Sipas të dhënave të referuara, rreth 44 për qind e fëmijëve raportojnë se kanë përjetuar forma të ndryshme dhune nga prindërit.

Ekspertët theksojnë se shumë prindër përballen me presion të madh nga mungesa e kohës, vështirësitë financiare dhe balancimi i punës me familjen, gjë që në disa raste çon në situata të mbingarkesës.

Megjithatë, ata vlerësojnë se shoqëria po ndryshon në mënyrë graduale drejt refuzimit të dhunës në edukim, edhe pse sfidat në zbatimin praktik të këtij parimi mbeten të pranishme. SIpas tyre “një shuplakë nuk është kurrë e shëndetshme”/albinfo.ch/