Edhe kjo fundjavë përvëluese në Zvicër, temperaturat deri në 38 gradë

Fundjavë me temperatura afrikane në Zvicër, termometri ngjitet në 38°C

Vala e të nxehtit që ka përfshirë Zvicrën gjatë ditëve të fundit pritet të arrijë kulmin të shtunën, veçanërisht në pjesën frankofone të vendit, transmeton albinfo.ch.

Sipas parashikimeve të MeteoSwiss, temperaturat do të arrijnë në 34 gradë Celsius në Fribourg, 35 gradë në Lozanë, 36 gradë në Sion, Delémont, Neuchâtel, Biel/Bienne dhe Yverdon, ndërsa në Gjenevë termometri mund të shënojë deri në 37-38 gradë Celsius.

Megjithatë, ka lajme të mira për ata që mezi po e përballojnë vapën. Sipas meteorologëve, nga dita e hënë pritet një rënie graduale e temperaturave, duke sinjalizuar fundin e kësaj vale të nxehti.

Temperatura maksimale të hënën parashikohet të jetë rreth 32 gradë Celsius, ndërsa të martën do të zbresë në 29 gradë. Të mërkurën pritet një tjetër rënie, me temperatura që do të lëvizin rreth 28 gradë Celsius.

Megjithëse moti do të mbetet i ngrohtë, kushtet pritet të jenë dukshëm më të përballueshme krahasuar me ditët e fundit të vapës ekstreme. /Albinfo.ch

---