Dyshime të shumta për kompaninë “Air Albania”

Plani për ndërtimin e kompanisë kombëtare të fluturimit në Shqipëri, “Air Albania”, vishet me dyshime.

“CH Aviation”, një portal zvicerian i specializuar për zhvillimet në industrinë e Aviacionit, shkruan se projekti “Air Albania” është lënë në harresë, ndërkohë që avionët e siguruar nga “Turkish Airlines” janë rikthyer në Turqi.

Ideja për krijimin e kompanisë kombëtare të fluturimeve u njoftua për herë të parë në korrik të vitit 2017, si një nismë e përbashkët e kryeministrit shqiptar, Edi Rama dhe presidentit turk Erdogan. Nisma u zyrtarizua një vit më vonë, shkruan tch, përcjell albinfo.ch.

Në qershor të vitit 2018 u krijua kompania “Air Albania” me 3 aksionarë: “Turkish Airlines”, “MDN Investment” dhe “Albcontrol”. Menjëherë pas krijimit, shefi i qeverisë shqiptare dha edhe afate konkrete se kur shqiptarët do të udhëtonin me kompaninë e tyre ajrore.

Belinda Balluku, ministrja aktuale e Infrastrukturës në Shqipëri, në atë kohë drejtoreshë e “Albcontrol”-it, premtoi se më në fund qytetarët do të shpëtonin nga çmimet e kripura të biletave që paguajnë aktualisht.

Por, plani i qeverisë shqiptare rezultoi optimist, të paktën sa u përket afateve.

Zyrtarisht, autoritetet shqiptare thonë se kompania është ende në proces për të marrë lejet e nevojshme nga organizmat ndërkombëtarë dhe se projekti po ecën sipas planit. 

Por, zërat skeptikë mbi fatin e kompanisë janë shtuar ndjeshëm, jo vetëm brenda vendit, por edhe jashtë saj.