Dy shtetas shqiptarë të bllokuar në Rripin e Gazës

Keystone (AP Photo/Fatima Shbair)

Ambasadorja e Shqipërisë në Izrael, Meri Kumbe, ka njoftuar se dy shtetas shqiptarë, motër e vlla, ndodhen aktualisht në Rripin e Gazës së bashku me fëmijët e tyre të mitur. Në një lidhje direkte në “Opinion”, ajo tha dy qytetarët në fjalë janë në kontakt të vazhdueshëm me ambasadën shqiptare në Egjipt dhe se po kryhen të gjitha procedurat e nevojshme për t’i kthyer shëndoshë e mirë në atdhe.

“Kemi dy raste të raportuara, qytetarë me pasaportë shqiptare të cilët fatkeqësisht i zbuluam për shkak të luftës që ekzistonin. Nuk e dinim më përpara. Janë motër e vëlla, kanë fëmijë të mitur, që automatikisht për ligjet e shtetit shqiptar konsiderohen fëmijë shqiptarë.

Janë në kontakt me ambasadën shqiptare në Egjipt. Kemi bërë procedurat e nevojshme dhe jemi në pritje të udhëzimeve që do të vijnë. Ky është një problem që i ka lindur të gjitha shteteve. Jemi në koordinim të gjitha strukturat dhe vendet me njëra tjetrën për të parë mundësitë dhe si do të realizohet konkretisht”,- deklaroi Kumbe.