Futboll

Dy ish-yjet e Kosovës, pjesë e të ftuarve për sfidat e Shqipërisë me Çekinë dhe Poloninë

E premte, 1 Shtator 2023 - 17:40 albinfo.ch
Foto Facebook: Federata Shqiptare e Futbollit

Kombëtarja shqiptare është gati të nisë përgatitjet për dy ndeshjet e ardhshme të kualifikueseve të Kampionatit Evropian, “Gjermani 2024” me trajnerin Sylvio Mendes Campos Junior, i cili ka shpallur sot listën me emrat e 25 lojtarëve të ftuar për këto sfida.

Dy risitë kryesore janë emrat e sulmuesve Arbnor Muja dhe Mirlind Daku, të cilët ftohen për herë të parë me kuqezinjtë, pasi më parë luajtën për Kosovën, përcjell albinfo.ch.

Ndërkohë, në mesfushë ka dy rikthime të rëndësishme me Klaus Gjasulën dhe Odise Roshin që janë ftuar për dy sfidat e shtatorit, teksa në mbrojtje emri që vjen pas një mungese, është ai i Arlind Ajetit.

Në mesfushë do të mungojë Armir Abrashi, teksa sa i përket pjesës tjetër të listës nuk ka ndryshime dhe konfirmohet grupi i lojtarëve, që ishte i përkushtuar edhe në ndeshjet me Moldavinë dhe Ishujt Faroe në qershor.

Kombëtarja e Shqipërisë do të nisë zyrtarisht përgatitjet të hënën, me stërvitjet do të zhvillohen në Shtëpinë e Futbollit.

Trajneri Sylvinho do të dalë në konferencë për mediat nesër, për të folur në lidhje me zgjedhjet e tij dhe objektivat për dy nga sfidat më të rëndësishme në këto kualifikuese.

Shqipëria do të luajë në udhëtim ndaj Republikës Çeke më 7 shtator, ndërsa më 10 shtator do të presë Poloninë në stadiumin “Air Albania”.

 Të tjera nga Futboll

Xhemaili shënon dy gola në fitoren e Zvicrës ndaj Maltës

 E-Diaspora

 Jeta në Austri