Deputetët e VV-së tërhiqen nga kompensimi i shpenzimeve të udhëtimit

Pas publikimit të shpenzimeve për derivate, VV-ja tërhiqet nga kompensimi

Deputetët e Vetëvendosjes janë tërhequr nga kompensimi i shpenzimeve të udhëtimit. Kështu ka bërë të ditur shefja e Grupit Parlamentar të Vetëvendosjes, Mimoza Kusari-Lila, teksa u ka bërë thirrje edhe deputetëve të tjerë që të aplikojnë të njëjtin standard, përcjell albinfo.ch.

Po ashtu Kusari-Lila thotë se do të kërkojnë nga Kryesia e Kuvendit rishikimin e vendimit për kompensim të deputetëve. Gjithë kjo erdhi pas publikimit të shpenzimeve të deputetëve të Kosovës për derivate.

“Me anë të këtij njoftimi duam të informojmë opinion publik se deputetët e Lëvizjes Vetëvendosje, si shumicë parlamentare, vullnetarisht do të tërhiqen nga kompensimi i shpenzimeve të udhëtimit dhe njëkohësisht thërrasin edhe deputetët e tjerë të aplikojnë të njëjtin standard. Gjithashtu, do të kërkojmë nga Kryesia e Kuvendit rishikimin e vendimit për kompensimin e deputetëve. Ne mbetemi të përkushtuar në ngritjen e performances së punës së deputetëve, llogaridhënies dhe përgjegjësisë ndaj qytetarëve të Republikës”, ka shkruar Kusari-Lila.

 

---