Cila është e vërteta për kompaninë që po kërkon 2 mijë punëtorë?

Për këtë temë është deklaruar kryeministri i Kosovës, Ramush Haradinaj dhe përfaqësuesit e Policisë së Kosovës

Një kompani gjermane që u shfaq në Prizren, duke kërkuar 2 mijë punëtorë për Gjermani, ka ngjallur dyshime nëse kompania është e vërtetë, apo brenda saj ka lajme të rreme, pasi asnjë kompani deri më tani nuk ka kërkuar aq shumë punëtorë.

Për këtë temë është deklaruar kryeministri i Kosovës, Ramush Haradinaj dhe përfaqësuesit e Policisë së Kosovës.

RTK ka kontaktuar edhe kompaninë në Hamburg, për të nxjerrë deklarata të sakta.

Në emrin e saj, kompania kosovare BSB Aviation, një ditë më parë në Prizren hapi aplikimet për pranimin e 2 mijë punëtorëve, përcjell albinfo.ch.

Një ditë më parë, përfaqësuesit e saj, thanë se kanë nevojë për 2 mijë punëtorë, duke treguare dhe pagesën.

Por gjatë ditës, u shtuan dyshimet për këtë çështje, meqë asnjëherë kompani të huaja e vendore nuk kanë kërkuar përnjëherë  numër kaq të madh punëtorësh.

Madje për këtë çështje u pyet edhe Haradinaj, i cili konfirmoi se do të ketë hetim. Ndërsa Policia e Kosovës, gjithashtu konfirmoi se ka filluar të merret me rastin, pasi thirrjen e kësaj kompanie për punësime masive e konsiderojnë si të dyshimtë.

“Referuar pyetjeve tuaja ju informojmë se drejtoria kompetente pranë Policisë së Kosovës, i posedon këto informacione dhe të njëjtat është duke i trajtuar në aspektin policor”.

RTK gjatë ditës kontaktoi kompaninë OBM Aviation në Hamburg. Një nga zyrtarët e saj e konfirmoi bashkëpunimin me kompaninë kosovare dhe vërtetësinë e kërkimit të punëtorëve.

Duke sugjeruar që për më shumë të bisedohet me përfaqësuesit e kompanisë kosovare BSB Aviation, zyrtarja nga kompania gjermane tha se kanë nevojë për 5 mijë punëtorë, që do të ngarkonin e shkarkonin valixhe, në aeroportet e Frankfurtit, Kolnit etj në Gjermani.

Kjo zyrtare ia dha RTK-së emrin, mbiemrin dhe numrin kontaktues të personit të autorizuar në Kosovë.

Megjithatë, kontakti me këtë person ishte i pamundur meqë telefoni vazhdimisht ishte i mbyllur.

Ndërkohë, RTK ka gjetur se në Agjencia për Regjistrimin e  Bizneseve, kompania BSB Aviation është regjistruar vetëm pesë ditë më parë.

Kapitali i saj është vetëm 1 mijë euro kurse selia ndodhet në Prizren.

https://www.youtube.com/watch?time_continue=99&v=DhY5LZHFXTk

---