Carney nga Strasburgu: Kanadaja dhe Evropa duhet të afrohen më shumë

Kryeministri kanadez Mark Carney ka bërë thirrje për një partneritet shumë më të thellë mes Kanadasë dhe Evropës, duke thënë se të dyja palët duhet të bashkojnë forcat përballë ndryshimeve të mëdha ekonomike dhe gjeopolitike në botë.

Duke iu drejtuar Parlamentit Evropian në Strasburg të enjten, Carney tha se Kanadaja dhe Bashkimi Evropian duhet të thellojnë bashkëpunimin në fusha strategjike, përfshirë tregtinë, mbrojtjen, inteligjencën artificiale, energjinë, mineralet kritike, hapësirën dhe shërbimet financiare, përcjell albinfo.ch.

“Kanadaja dhe Evropa janë secila të forta. Evropa dhe Kanadaja janë më të forta së bashku”, tha Carney, duke argumentuar se një partneritet më i thellë do t’i ndihmonte të dyja palët të zvogëlonin varësitë strategjike dhe të forconin qëndrueshmërinë ekonomike.

Kryeministri kanadez mirëpriti gjithashtu propozimin e presidentes së Komisionit Evropian, Ursula von der Leyen, për të shkuar përtej marrëveshjes aktuale tregtare CETA dhe për të hapur mundësinë e një forme të re partneriteti, ku Kanadaja mund të bëhej vendi i parë “anëtar i asociuar” i BE-së. Detajet dhe forma juridike e një marrëdhënieje të tillë ende duhet të përcaktohen.

Carney propozoi gjithashtu lehtësimin e tregtisë digjitale, forcimin e bashkëpunimit në industrinë e mbrojtjes dhe krijimin e më shumë mundësive që të rinjtë kanadezë dhe evropianë të studiojnë, punojnë dhe jetojnë në të dyja anët e Atlantikut. Ai përmendi në këtë kuadër edhe mundësinë e pjesëmarrjes së Kanadasë në programin Erasmus+.

Vizita në Strasburg vjen në një periudhë kur Kanadaja po synon të diversifikojë marrëdhëniet e saj ekonomike dhe të zvogëlojë varësinë nga tregu amerikan. Carney ka deklaruar se synon të dyfishojë tregtinë kanadeze me vendet jashtë SHBA-së gjatë dekadës së ardhshme.

---