Bllokimet në autostradat zvicerane u rritën ndjeshëm në vitin 2025

(KEYSTONE/Gaetan Bally)

Bllokimet në autostradat e Zvicrës janë përkeqësuar ndjeshëm gjatë vitit 2025, duke arritur në gati 68 mijë orë pritje, rreth 20% më shumë se një vit më parë, sipas të dhënave të Zyrës Federale të Rrugëve, FEDRO.

Rritja më e madhe është shënuar në autostradat më të ngarkuara të vendit, si A1, A2 dhe A3. Në aksin A2 Basel–Chiasso, bllokimet u rritën me 31%, duke arritur në 15,740 orë, transmeton albinfo.ch.

Sipas FEDRO-s, shkaku kryesor nuk ishin punimet në rrugë, por volumi i lartë i trafikut. 89% e bllokimeve u shkaktuan nga tejkalimi i kapacitetit të rrjetit rrugor, ndërsa më pak se 4% lidhen me punimet.

Në vitin 2025, automjetet përshkuan rreth 30 miliardë kilometra në rrjetin kombëtar rrugor të Zvicrës. Edhe pse autostradat përbëjnë vetëm rreth 3% të rrjetit rrugor, ato bartin pothuajse 45% të gjithë trafikut rrugor në vend.