BE-ja kritikon Kosovën: Mbyllja e objekteve në veri rrezikon përshkallëzimin e situatës

Bashkimi Evropian ka reaguar të premten ndaj veprimeve të fundit të autoriteteve të Kosovës në komunat veriore, duke paralajmëruar për rrezikun e përshkallëzimit të situatës në terren. Reagimi vjen pas një sërë ndërhyrjesh nga institucionet e Kosovës, të cilat kanë marrë nën kontroll disa objekte që më parë shfrytëzoheshin nga struktura të lidhura me sistemin e Serbisë, shkruan albifno.ch.

Sipas deklaratës së BE-së, veprime të tilla si inspektimet, mbylljet dhe marrja nën kontroll e objekteve nga ana e policisë së Kosovës mund të ndikojnë negativisht në jetën e përditshme të komuniteteve lokale, si dhe të dëmtojnë imazhin ndërkombëtar të Kosovës.

“Operacionet, inspektimet dhe mbylljet e fundit të policisë në Kosovë rrezikojnë të përkeqësojnë tensionet dhe të ndikojnë negativisht në jetën e përditshme të komuniteteve lokale, si dhe të minojnë imazhin ndërkombëtar të Kosovës,” thuhet në reagimin e BE-së, transmeton albinfo.ch.

Objektet e përfshira përfshijnë ndërtesa të përdorura nga Shërbimi Nacional për Punësim, Ndërmarrja Publike Komunale “Ujësjellësi Ibër”, palestra sportive, muzeu i qytetit dhe institucione të tjera në Mitrovicën e Veriut dhe Zubin-Potok.

Bashkimi Evropian i ka bërë thirrje qeverisë së Kosovës dhe kryeministrit në largim Albin Kurti që të ndalojnë mbylljet e tilla dhe të shmangin masa që mund të çojnë në përshkallëzim të mëtejshëm të situatës.

“Veprimet e njëanshme dhe të pakoordinuara minojnë përpjekjet për ndërtimin e besimit midis komuniteteve,” thuhet më tej në deklaratë.

BE-ja ka përsëritur kërkesën që Kosova dhe Serbia të angazhohen në mënyrë konstruktive në procesin e dialogut dhe të zbatojnë marrëveshjen për normalizimin e marrëdhënieve dhe aneksin e saj pa vonesa dhe pa parakushte. Në këtë kuadër, është përmendur edhe zbatimi i Asociacionit të komunave me shumicë serbe, si pjesë e marrëveshjeve të dakorduara më herët në Bruksel, transmeton albinfo.ch.