Basel: Nismë për ulje tatimore për familjet me fëmijë

@Envato

Në kantonin e qytetit Basel-Stadt po propozohet një nismë e re që synon të rrisë lindshmërinë përmes lehtësimeve tatimore. Aktualisht, zbritja tatimore për çdo fëmijë është 8,900 franga, por sipas nismës së iniciuar nga ish-deputeti Emmanuel Ullmann, prindërit mund të përfitojnë 35,000 franga për fëmijën e parë, 15,000 për të dytin dhe 10,000 për çdo fëmijë tjetër.

Qëllimi është të kompensohen kostot e larta të rritjes së fëmijëve, veçanërisht kur njëri prind redukton orarin e punës për t’u kujdesur për fëmijët. Ullmann vlerëson se masa do t’i kushtojë kantonit rreth 60–70 milionë franga në vit, por e sheh si një investim të nevojshëm për të ardhmen e shoqërisë, transmeton albinfo.ch.

Reagimet politike janë të përziera: disa kërkojnë që përfitimet të jenë më të synuara për familjet me të ardhura të ulëta, ndërsa të tjerë preferojnë uljen e përgjithshme të normës së tatimit për të gjithë.

Statistikat tregojnë se lindshmëria në Basel-Stadt ka qenë historikisht e ulët: në 2024-n, mesatarja e fëmijëve për grua ra në 1,09, më e ulëta në të gjithë Zvicrën. Një ndër faktorët kryesorë është mungesa e hapësirës dhe çmimet e larta të banesave.