Avni Orllati sjell në Kosovë përvojën e Zvicrës me parkun solar 105 MW në Kramovik

Investitori nga Zvicra, Avni Orllati, ka nisur realizimin e një prej projekteve më të rëndësishme në fushën e energjisë së pastër në Kosovë, parkun solar me kapacitet prej 105 megavatësh në Kramovik të Rahovecit.

Përmes kompanisë Orllati Group, e zhvilluar në Zvicër, Orllati po sjell në Kosovë përvojën, kapitalin dhe standardet e punës të krijuara ndër vite jashtë vendit.

Gjatë fillimit të punimeve për këtë projekt, Orllati u shpreh i kënaqur që një investim i tillë po realizohet në Kosovë, duke e cilësuar atë si një projekt me rëndësi të veçantë për energjinë e pastër dhe zhvillimin e sektorit energjetik.

“Jam shumë i kënaqur me qenë sot para juve. E falënderoj Qeverinë që na ka dhënë mundësinë për me pasë rastin me bë këtë projekt. Është shumë i rëndësishëm për Kosovën, për neve, edhe me qenë energjia e pastër”, deklaroi Orllati, transmeton albinfo.ch.

Sipas tij, në këtë park solar do të vendosen rreth 1.2 milionë metra katrorë panele, duke e bërë këtë një investim me përmasa të mëdha në prodhimin e energjisë nga burimet e ripërtëritshme.

Orllati falënderoi institucionet, ekipet profesionale dhe partnerët që kanë punuar për përgatitjen dhe nisjen e projektit, duke theksuar se realizimi i tij ka kërkuar angazhim dhe përkushtim për një periudhë të gjatë.

“Projektet e mëdha i kanë disa pengesa të vogla, por kryesorja sot është që puna ka nisur dhe ka me vazhduar”, tha ai.

Kompania Orllati Group, e zhvilluar në Zvicër, është një shembull i investimit të diasporës në Kosovë, duke kthyer përvojën dhe kapacitetet e krijuara jashtë vendit në një projekt strategjik brenda vendit.

Parku solar në Kramovik vjen pas një ankandi konkurrues të Ministrisë së Ekonomisë, ku çmimi prej 48.88 euro për megavat-orë u përcaktua përmes garës ndërmjet ofertuesve.

Projekti pritet të kontribuojë në rritjen e prodhimit vendor të energjisë dhe në forcimin e furnizimit me energji nga burime të pastra.